PRO Esports តំណាងឱ្យប្រទេសកម្ពុជាក្នុង MSC 2026

ក្រុមកីឡាអេឡិចត្រូនិក PRO Esports បានគ្រងជើងឯកលីគអាជីពកីឡាអេឡិចត្រូនិក MPL Cambodia រដូវកាលទី១០ លើកដំបូងបង្អស់ បន្ទាប់ពីផ្តួលក្រុម Galaxy Legends លទ្ធផល ៤-០ ក្នុងជំនួបផ្តាច់ព្រ័ត្រនៅថ្ងៃទី១៧ ខែឧសភា។ PRO Esports ទទួលបានឱកាសក្នុងនាមជាក្រុមតំណាងឱ្យកម្ពុជា ទៅប្រកួត Mid Seasons Cup 2026 ក្នុងព្រឹត្តិការណ៍កីឡាអេឡិចត្រូនិកកម្រិតពិភពលោក Esports World Cup 2026 នៅប្រទេសបារាំង។

នៅការប្រកួត MPL Cambodia រដូវកាលទី១០ ក្រុម PRO Esports ជាក្រុមខ្លាំងមួយចាប់តាំងពីការប្រកួតវគ្គសន្សំពិន្ទុ ​Regular Season ដោយពួកគេប្រកួតមិនចាញ់សូម្បីមួយប្រកួត។ លុះចូលការប្រកួតក្នុងវគ្គជម្រុះដណ្តើមពាន (Playoffs) ក្រុម PRO Esports ភ្លាត់ចាញ់ការប្រកួតម្តង ទល់នឹងក្រុម Galaxy Legends លទ្ធផល ៣-០ អំឡុងការប្រកួតវគ្គ Final Upper Bracket។ 

បរាជ័យនោះ ជាពេលវេលាដ៏លំបាក និងសឹងតែធ្វើឱ្យក្តីសង្ឃឹមទៅដណ្តើមពានរបស់ PRO Esports រសាត់ឆ្ងាយ។ 

យ៉ាងណាមិញ PRO Esports ទោះធ្លាក់ទៅប្រកួតនៅវគ្គ Final Lower Bracket ប៉ុន្តែពួកគេអាចប្រកួតយកឈ្នះក្រុម CFU Gaming ជាក្រុមការពារជើងឯក នៅក្នុងលទ្ធផល ៤-៣ ដ៏តានតឹង រហូតរកបានឱកាសត្រឡប់ឡើងទៅវគ្គផ្តាច់ព្រ័ត្រ​វិញ។ ឈានជើងចូលជំនួបផ្តាច់ព្រ័ត្រ PRO Esports បានបង្ហាញទម្រង់លេងល្អខ្លាំង ការយល់ចិត្តគ្នារវាងកីឡាករ និងការរៀបចំយុទ្ធសាស្ត្រក្នុងការរើសតួអង្គប្រកួតបានល្អពីគ្រូបង្វឹក ជួយឱ្យក្រុមមួយនោះសងសឹងក្រុម Galaxy Legends វិញបាន​ ក្នុងលទ្ធផល ៤-០ គ្មានការតដៃវិញបាន ហើយក៏គ្រងជើងឯក MPL KH រដូវកាលនេះ។

នេះជាការគ្រងជើងឯកលើកដំបូងបង្អស់សម្រាប់ក្រុម PRO Esports ចាប់តាំងពីក្រុមមួយនេះ បានចូលប្រលូកក្នុងវិស័យកីឡាអេឡិចត្រូនិក និងលីគអាជីព MPL KH ចាប់តាំងពីរដូវកាលទី៤ មក។ លើសពីនេះ វាក៏ជាកំណត់ត្រាថ្មីបន្ថែមទៀតសម្រាប់ PRO Esports បន្ទាប់ពីរដូវកាលទី៩ ពួកគេធ្វើបានល្អដែរ ដោយបានបញ្ចប់ចំណាត់ថ្នាក់លេខ ៣។

បន្ទាប់ពីក្លាយជាជើងឯករួច ក្រុម PRO Esports ក៏នឹងមានភារកិច្ចជាក្រុមតំណាងឱ្យកម្ពុជា​ ធ្វើដំណើរទៅកាន់ការប្រកួតពានរង្វាន់ MSC 2026 ក្នុងព្រឹត្តិការណ៍កីឡាអេឡិចត្រូនិកពិភពលោក Esports World Cup (EWC) 2026 នៅប្រទេសបារាំង។ ដើមឡើយព្រឹត្តិការណ៍ EWC 2026 នឹងត្រូវរៀបចំនៅក្នុងទីក្រុងរីយ៉ាដ ប្រទេសអារ៉ាប៊ីសាអូឌីត ប៉ុន្តែអ្នករៀបចំក៏បានសម្រេចចិត្តផ្លាស់ប្តូរទៅរៀបចំនៅទីក្រុងប៉ារីស ប្រទេសបារាំងវិញ ព្រោះតែមូលហេតុបារម្ភចំពោះការធ្វើដំណើររបស់កីឡាករ ដែលឆ្លងកាត់តំបន់មជ្ឈិមបូព៌ាដែលកំពុងតែមានសង្គ្រាម។

សម្រាប់ការប្រកួត MPL KH ចំនួន ១០រដូវកាលមកនេះ ក្រុមដែលបានសាងកេរ្តិ៍ឈ្មោះជាក្រុមជើងឯកប្រចាំលីគអាជីពកីឡាអេឡិចត្រូនិកនៅកម្ពុជា រួមមានក្រុម See You Soon ចំនួន ៣លើក, Burn x Flash ចំនួន ២លើក, CFU Gaming ចំនួន​៣លើក, Impunity KH ១លើក និងចុងក្រោយ PRO Esports